काठमाडौं : प्रधानमन्त्री केपी ओलीले राष्ट्रिय हित, स्वभिमान र नेपालको आवश्यकतालाई केन्द्रमा राखेर छिमेकी चीनसँग सहमति र समझदारी गरिने स्पष्ट पारेका छन् ।
मंगलबारदेखि सुरु हुने आफ्नो चीन औपचारिक भ्रमणका बारेमा प्रतिनिसभा र राष्ट्रियसभामा सोमबार जनाकारी दिँदै प्रधानमन्त्री ओलीले भने, ‘हामीले एक अर्काको संवदेनशीलता बुझेका छौं । त्यसै अनुसार दुवै देशले एकअर्काको हितमा सहमति र सझदारी गर्दै अघि बढ्नु पर्छ ।’
उनले भने, ‘चीन भ्रमणको मुख्य उद्देश्य मुलुकको सार्वभौमिकता र एकतालाई ध्यानमा राखी द्विपक्षीय सम्बन्ध विस्तार र सुदृढ गरिनु हो । सहमति र समझदारी मुलुक र जनताको आवश्यत्ता अनुसार हुने छन् ।’
२७ महिना अघिको आफ्नो चीन भ्रमणका उपलब्धी स्मरण गर्दै प्रधानमन्त्रीले ओलीले भने, ‘ती सहमति र समझदारीले नेपालको इतिहास र परम्परागत मित्रता स्मरण त गराएको छ ।’ ओलीले सन् २०१६ मार्चमा चीन भ्रमण गरेका थिए ।
भ्रमणका बेला पारवहन तथा यातायात, विद्युत् ट्रान्ससिमनलगायतका समझदारी भएका थिए । ती समझदारीको कार्यान्वयनबारे यो भ्रमणमा छलफल हुने प्रधानमन्त्रीले बताए ।
नेपालले बीआरआईमा हस्ताक्षर गरिसकेको हुँदा चिनियाँ विकासका उपलब्धी शेयर गर्ने र कनेक्टिभीटी बढाइने उनको तर्क छ ।
प्रधानमन्त्रीले बहुपक्षीय हिमालयन कनेक्टिभीटीको फ्रेमवर्क भित्र सबै खाले काम अघि बढ्ने दाबी उनले गरे । उत्तर दक्षिणका करिडरका साथै थप केही करिडरमा समझदारी हुन सक्ने उनले बताए ।
चीन भ्रमणका क्रममा राष्ट्रपति सि चीनफिङसँग द्विपक्षीय सम्बन्ध बिस्तार र सुदृढ गर्ने बारेमा भेटवार्ता हुँदा आफूले नेपालका हित र दृष्टिकोणमै केन्द्रित हुने प्रतिवद्धा उनले व्यक्त गरे । चीनको शीर्ष नेतृत्वसँगको वार्ता भई रेलवे, ऊर्जा, पुनर्निर्माणमा दुईपक्षीय सम्झौता र समझदारीमा हस्ताक्षर हुने प्रधानमन्त्रीले उल्लेख गरे ।
बेइजिङपछि ल्हासा जाने र त्यहाँका नेतासँग भेटवार्ता हुने जानकारी ओलीले दिए । उनले भने, ‘हामीले चीनका संवेदनशीलता बुझेका छौं । एक चीन नीतिमा हामी दृढ छौं । नेपालको भूमी प्रयोग गरेर चीनविरोधी गतिविधि गर्न दिँदैनौं । छिमेकीका जायज चासोलाई सुन्ने गरेका छौं’, उनले भने ।
प्रतिक्रिया दिनुहोस !
