परासी : पश्चिम नवलपरासीका स्थानीय जनप्रतिनिधि सुरक्षा माग्दै जिल्ला प्रशासन कार्यालय पुगेका छन् । नेत्रविक्रम चन्द ‘विप्लव’ समुहबाट अपराधिक घटनासहित सुरक्षा चुनौती बढेको भन्दै मंगलबार जिल्लाका सात स्थानी तहका प्रमुखहरु जिल्ला प्रशासन कार्यालय पुगेर सुरक्षाको माग गरेका हुन् । जिल्लामा तीन नगरपालिका र चार गाउँपालिका छन् ।
प्रमुख जिल्ला अधिकारी देवेन्द्र लामिछानेलाई ज्ञापन पत्र बुझाउँदै स्थानीय तहका प्रमुखले शान्ति सुरक्षाको प्रत्याभुतिसहित भयरहित वातावरणमा जनताको काम गर्ने अवस्था सिर्जना गर्न माग गरेका हुन् । अपराधिक मानसिकता बोकेका अराजक तत्वले टेलिफोनमार्फत धम्काउने, त्रास देखाउने र ज्यानमार्ने धम्कीसमेत दिने गरेको स्थानीय तहका प्रमुखहरुले बताएका छन् ।
जनप्रतिनिधि नै असुरक्षित हुनुले समग्र जिल्लाकै शान्ति सुरक्षाको अवस्था नाजुक भएको ज्ञापन पत्रमार्फत् उनीहरुले ठहर गरेका छन् । असुरक्षा बढेको भन्दै जनप्रतिनिधिले व्यक्तिगत सुरक्षाका लागि सुरक्षाकर्मी उपलव्ध गराउन समेत माग गरेका छन् । रामग्राम नगरपालिकाका प्रमुख नरेन्द्र गुप्ताले पछिल्लो पटक जनप्रतिनिधिलाई कार्यालय, घर र जनताका काम गर्ने क्रममा बाहिर जाँदासमेत असुरक्षित महशुस हुने गरेको बताए । शान्ति सुरक्षाका लागि हरेक स्थानीय तहमा प्रहरी सुरक्षाको व्यवस्था हुनुपर्ने उनीहरुको माग छ ।
सरावल गाउँपालिकाका अध्यक्ष राधेश्याम चौधरीले आफूलाई बारम्बार टेलिफोनबाट राजीनामा गर्न र डर त्रास देखाउँदै धम्की आउने गरेको बताए । तीन महिनाअघि जिल्लाका सबै स्थानीय तह प्रमुखलाई विप्लव समुहले राजीनामा गर्न उर्दी जारी गरेको थियो । उर्दीलाई वेवास्ता गरेको भन्दै सोमबार सुस्ता गाउँपालिकाका अध्यक्ष रामप्रसाद पाण्डेलाई दुव्र्यवहार गरेपछि जनप्रतिनिधिले आफूहरु असुरक्षित भएको भन्दै सुरक्षाका लागि जिल्ला प्रशासन पुगेका हुन् ।
कारबाही गर्न माग
जिल्लाका स्थानीय तह प्रमुखले सोमबार सुस्ता गाउँपालिकाका अध्यक्ष रामप्रसाद पाण्डेमाथि भएको घटनामा संलग्नलाई कारबाही गर्न माग गरेका छन् । सातवटै स्थानीय तहका प्रमुखले मंगलबार विज्ञप्ती जारी गर्दै विप्लव समुहका कार्यकर्ताले अध्यक्ष पाण्डेमाथि गरेको दुव्र्यवहार निन्दनीय र घृणित भएको ठहर गरेका छन् ।
जनताका हरेक सेवा र आवश्यकतालाई पूरा गराउन स्थापित स्थानीय तहका जनप्रतिनिधिलाई हतोत्साहित गराउन गरिएको घटना घृणित भएको भन्दै त्यस्ता अराजक तत्वलाई कारबाही गर्न विज्ञप्तीमार्फत माग गरेका हुन् । सोमबार विप्लव समुहको जनपरिषद्को नाउँबाट अध्यक्ष पाण्डेमाथि मोबिल खनाएर दुव्र्यवहार गरिएको थियो ।
प्रतिक्रिया दिनुहोस !
