जोमसोम : मुस्ताङमा नगद ७३ हजार नगदसहित ६ जुवाडे पक्राउ परेका छन् ।
मुस्ताङको घरपझोङ गाउँपालिका—४ जोमसोम स्थित काठेपुल नजिक कुलमान सिंह थापाले सञ्चालन गरेको हाम्रो होटलमा मंगलबार साँझ करिब ७ :३० बजेतिर जुवातास खेल्दै गरेका ६ जना जुवाडेलाई प्रहरीले पक्राउ गरेको जिल्ला प्रहरी कार्यालय मुस्ताङले जनाएको छ ।
जुवातास खेलिरहेको अवस्थामा तनहु शुक्लागण्डकी न.पा.२ बस्ने ३४ वर्षीय कृष्ण गुरुङ, तनहु म्यादे गापा—५ बस्ने ३१ वर्षीय राजेन्द्र थापा, स्याङ्जा विरुवा गापा— १ बस्ने ४७ वर्षीय टापबहादुर थापा, स्याङ्जा पुतली बजार न.पा. ११ बस्ने ४४ वर्षीय धनबहादुर गुरुङ र स्याङ्जा विरुवा गापा—४ घर भई घरपझोङ—४ जोमसोम काठेपुल नजिक होटल संञ्चालन गरी बस्ने ४६ वर्षीय होटल संञ्चालक कुलमान सिंह थापालाई प्रहरीले पक्राउ गरेको हो ।
जोमसोमस्थित काठेपुल नजिक हाम्रो होटलमा जुवा खेलिरहेको भन्ने सूचना प्रहरीलाई जानकारी गराइपछि जिल्ला प्रहरी कार्यालय मुस्ताङबाट प्रहरी निरीक्षकको कमाण्डमा खटिएको प्रहरी टोलीले खानतलासी गरेको थियो ।
प्रहरीले होटलमा जुवातास (म्यारिज) खेलिरहेको अवस्थामा फेला पारी जुवा खालबाट नगद ७३ हजारसहित ३ बुक तास बरामत गरेको जिल्ला प्रहरी कार्यालय मुस्ताङका सूचना अधिकारी गोपीकृष्ण सुवेदीले जानकारी दिए ।
प्रहरीले जुवा खेलाउने घरधनीसहित जुवातास खेल्ने ६ जनालाई जिल्ला प्रशासन कार्यालय मुस्ताङबाट हिरासतमा राख्ने अनुमती लिई थप अनुसन्धान भइरहेको जनाएको छ ।
प्रतिक्रिया दिनुहोस !
