MENU

संकटा विजयी

635x90

रत्नप्रसाद आचार्य शुक्रवार, फागुन ६, २०७३ 1647 पटक पढिएको

Share This

धरानः सिमरा गोल्डकप विजेता संकटा क्लब काठमाडौंले १९औं अन्तर्राष्ट्रिय आमन्त्रण रेडबुल बूढासुब्बा गोल्डकप फुटबल प्रतियोगितामा विजयी सुरुआत गरेको छ । धरान-१७ स्थित एन्फा टेक्निकल सेन्टरको खेलमैदानमा भएको बिहीबारको उद्घाटन खेलमा संकटाले पाहुना टोली भारतको कोलकातास्थित दुर्गापुर स्टिल फुटबल क्लबलाई ३-२ गोलले पराजित गर्दै क्वार्टरफाइनलमा स्थान बनायो । क्वार्टरफाइनलमा संकटाको भेएपीएफ क्लबसँगको भेट पक्का गरेको छ ।

संकटाको जितमा खेलको दोस्रो मिनेटमा अफ्रिकन खेलाडी मार्टिन अजयले पहिलो गोल गर्दै खेललाई १-० को अग्रता दिलाएका थिए । मार्टिनले कोलकाताका रक्षापंक्तिका खेलाडीलाई छक्याउँदै गोल गरेका थिए । पहिलो गोल खाएर दबाबमा रहेको कोलकाताका आक्काले संकटाविरुद्ध खेलको २४ औं मिनेटमा गोल गर्दै खेललाई १-१ को बराबरीमा पुर्याए । आक्काले सुशान्त हेम्ब्रिनले दिएको पासलाई सदुपयोग गर्दै हेड गोल गरेका थिए ।

३६ औं मिनेटमा संकटाका अनिल गुरुङले दोस्रो गोल गर्दै खेललाई २-१ को अग्रता दिलाए । मार्टिनले दिएको पासलाई सदुपयोग गर्दै अनिलले गोल गरेका थिए । पहिलो हाफमा २-१ गोलले पछि परेको कोलकाता दोस्रो हाफमा संकटाविरुद्ध आक्रामक रूपमा प्रस्तुत भएको थियो । ५२ औं मिनेटमा कोलकाताका सलादुन मिर्दाको २५ यार्ड लामो फ्रिकिक प्रहार विपक्षीलाई ठोकिएर गोलमा परिणत भयो ।

७७ औं मिनेटमा संकटाका सुशील केसीले तेस्रो गोल गरेका थिए । उनले राज पौडेलको पासलाई सदुपयोग गरी गोल गरेका थिए । कोलकाताका सुबन्दु घोसी म्यान अफ दी म्याच घोषित भए । उनले पाँच हजार रुपैयाँ पुरस्कार पाए । १० टोली सहभागि प्रतियोगिताको विजेताले पाँच लाख र उपविजेताले दुई लाख ५० हजार रुपैयाँ पुरस्कार प्राप्त गर्नेछन् । शुक्रबार नेपाल पुलिस र आयोजक धरान फुटबल क्लबबीच प्रतिस्पर्धा हुनेछ ।

National College 220X220Pix Ad for Annapurna

प्रतिकृया दिनुहोस

Annapurna Post1140X100