MENU

हिउँदे बिदामा रम्दै विद्यार्थी

नितु घले आइतवार, माघ ९, २०७३ 2264 पटक पढिएको

Share This

जाडोका कारण विद्यार्थीलाई विद्यालय जान गाह्रो हुन्छ । पढ्न, लेख्न कठिन हुन्छ । कलम चलाउने साना हात जाडोमा कठ्यांग्रिन्छन् । त्यसैले जाडोमा नेपालका प्रायः सबै विद्यालयमा बिदा दिइने चलन छ । यसरी दिइएको बिदा राम्रोसँग सदुपयोग होस् भनेर हिजोआज विद्यालयले विद्यार्थी भाइबहिनीको लागि 'विन्टर क्याम्प'को सञ्चालन गर्ने गरेको छ ।

आफ्नै विद्यालयले सञ्चालन गरेको एकमहिने विन्टर क्याम्पमा सहभागी सेन्ट जेभियर्स स्कुल, जावलाखेलकी कृतिका केसी क्याम्पमा निकै रमाएकी छिन् । कक्षा एकमा अध्ययनरत उनी यो एक महिनाको अवधिभर शिविरमा धेरै साथीहरूसँग भेटघाट र घुलमिल हुँदा निकै खुसी भइन् । साथीहरूसँग खेल्दा समय बितेको पत्तो नै पाइनन् उनले । यतिमात्रै कहाँ हो र शिविरमा आयोजना हुने विभिन्न खेलमा पहिलो हुँदा पाएको पुरस्कारले उनलाई थप हौस्याएको छ ।

सोही विद्यालयकी कक्षा दुईमा पढ्ने नुम्सा लावती भन्छिन्, 'विन्टर क्याम्प साँच्चै नै राम्रो छ । हामीले दिनदिनै रमाइलो गर्दै नयाँ कुरा सिक्ने मौका पाएका छौं ।'

घट्टेकुलोस्थित एसएबी स्कुलले पनि विन्टर क्याम्पको आयोजना गरेको छ । विद्यालयका पूर्वप्राथमिक तह तथा प्राथमिक तहका विद्यार्थी सम्मिलित विन्टर क्याम्पमा विद्यार्थी जीवनोपयोगी विभिन्न कक्षाहरूमा सहभागी भएका विद्यालयका शिक्षक सुनील शर्माले बताए । हिउँदे कक्षाको आकर्षणको रूपमा विद्यालयको प्रांगणमा विद्यार्थीले घोडा चढेर रमाइलो गरेका थिए । त्योबाहेक पाक शिक्षा, बजार भ्रमण, चित्रकला, आकार निर्माण, शिक्षामूलक कार्यक्रममा पनि उनीहरू सहभागी भएका थिए । विद्यार्थीले आफ्नो अभिभावकका लागि धन्यवाद कार्ड पनि निर्माण गरेका शर्माले बताए ।

हिँउदे बिदाको सदुपयोग गर्दै सुविधानगरस्थित ट्रिटन अपोलो स्कुलले भने गायन तथा नृत्य, नाटक, चित्रकला, कागजीकला, बालप्रतिभा प्रदर्शन तथा नौलो ठाउँ घुम्ने गरी हिउँदे शिविर सञ्चालन गरिरहेको छ । विद्यालयकी इभेन्ट मेनेजर तथा भाइस प्रिन्सिपल ममता शाहका अनुसार हिउँदे शिविरमा रहेको विभिन्न कार्यक्रमबाट विद्यार्थीले आफूलाई अझै निखार्ने मौका पाएका उनले बताइन् ।

आफ्नो विद्यालयका विद्यार्थीका साथै बिदामा घर बसेका वरिपरिका अन्य विद्यार्थी र केटाकेटीलाई समेत सहभागी गराई आयोजना गरिएको हिउँदे शिविरबाट बालबालिकामा रहेको प्रतिभा उजागर गर्न मद्दत पुगेको विद्यालयका प्रिन्सिपल पूर्णचन्द्र बस्यालले बताए ।

विद्यालयका पूर्वप्रिन्सिपल एवं वर्तमान निर्देशक राजन सुवेदीले विद्यार्थीलाई कथा लेखन तथा वाचनका साथै नाटकका विविध विषयमा जानकारी गराइएको छ । त्यसैगरी संगीत शिक्षक मोहन मगर, नृत्य शिक्षक रोहित बस्नेतले संगीत र नृत्य सिकाइराखेका छन् । ३० विद्यार्थीको सहभागिता रहेको सो शिविरको अन्तिम दिनमा विद्यार्थीले सिकेका कुरा प्रदर्शन गर्ने लक्ष्य रहेको इभेन्ट मेनेजर तथा भाइस प्रिन्सिपल ममता शाहले बताइन् ।

यस्ता खालका क्रियाकलापमा सहभागी हुँदा आफूमा भएका प्रतिभा अझै निखारिने र त्यसलाई बाहिर ल्याउन पनि सहज हुने बालबालिकाको अनुभव छ ।

Yamaha

प्रतिकृया दिनुहोस

dishhomeapp