MENU

'सबैको प्रतिनिधित्व लोकतन्त्रमै फस्टाउँछ'

रासस शुक्रवार, बैशाख ८, २०७४ 1892 पटक पढिएको

Share This

काठमाडौँ: प्रमुख निर्वाचन आयुक्त डा.अयोधीप्रसाद यादवले स्थानीय तहको यही वैशाख १६ गते हुने उम्मेदवारी मनोनयन कार्यमा सहभागी हुन नवगठित राष्ट्रिय जनता पार्टीलगायतका सबै राजनीतिक दललाई आह्वान गर्नुभएको छ ।

आज अन्तरपार्टी महिला सञ्जालका अध्यक्ष प्रतिभा राणाको नेतृत्वमा रहेको टोलीले बुझाएको ज्ञापनपत्र ग्रहणपछि प्रमुख निर्वाचन आयुक्त यादवले भन्नुभयो – “महिलाको जस्तै नेताहरुको पनि अन्तरपार्टी सञ्जाल बनाएर आगामी निर्वाचनमा भाग लिन नव गठितलगायत सबै राजनीतिक दललाई आह्वान गर्दछु ।”

उहाँले भन्नुभयो-“महिलालगायत सबै जातजातिको प्रतिनिधित्व लोकतन्त्रमै फस्टाउँछ । प्रजातन्त्रका संरक्षक भनेका राजनीतिक दल र नेता नै हुन् । तपाईंहरुको जस्तै सबै पार्टीका नेता सम्मिलित सञ्जाल भइदिएको भए धेरै राम्रो हुन्थ्यो ।”

अन्तरपार्टी सञ्जालमा व्यवस्थापिका-संसद्मा प्रतिनिधित्व गर्ने १० राजनीतिक दलका महिला सम्मिलित छन् । उक्त सञ्जालले संविधानसभामा भएको समानुपातिक समावेशी सहभागिताको हकको व्यवहारतः कार्यान्वयन गर्न कम्तीमा पनि स्थानीय तहलाई प्रस्थान विन्दु बनाउन सहयोग गरिदिन आयोग समक्ष आग्रह गरेको हो।

ध्यानाकर्षण पत्रमा भनिएको छ- 'स्थानीय तहबाट समानुपातिक समावेशी सहभागिताको हकको कार्यान्वयन गर्न स्थानीय तह निर्वाचन ऐनमा केही त्रुटि रहन गएको छ। त्यसलाई अध्यादेश मार्फत संशोधन गरेर दलित महिला नभएको स्थानमा अन्य समुदायका महिलाको उम्मेदवारी दिनसक्ने व्यवस्था मिलाउन ध्यानाकर्षण गर्न चाहन्छौ।”

वडा अध्यक्षमा ५० प्रतिशत महिला उम्मेदवारी दिने व्यवस्थाका लागि पनि आवश्यक पहल गरिदिन आयोगसमक्ष सञ्जालले आग्रह गरेको छ । देशमा २० वर्षपछि हुन लागेको स्थानीय तहको निर्वाचनले जनतामा खुसी र उत्साह थपेको जनाउँदै सञ्जालले ध्यानाकर्षणपत्रमा भनेको छ -“देशका सबै राजनीतिक दल र आम जनसमुदायको ध्यान अब निर्वाचनमा केन्द्रित भएको छ।'

जनसङ्ख्याको आधारमा महिला प्रतिनिधित्व सुनिश्चित हुनुपर्ने विषयलाई पनि सञ्जालले गम्भीरताका साथ उठाएको छ। महिला सञ्जालको टोलीमा पूर्व सांसद निलम बर्मा, लक्ष्मी साह, वसन्ती झा, मीना पाण्डे, कमला रोक्का, शशी श्रेष्ठलगायत हुनुहुन्थ्यो। रासस

National College 220X220Pix Ad for Annapurna

प्रतिकृया दिनुहोस

थप सामग्री

Annapurna Post1140X100